انواع الريايل

الرجل هو الاب المحب و الاخ الحنون وهذا شي الكل يتفق علية بس لما نتطرق بالحديث عن الرجل في حالت الحبيب فالحديث هني ياخذ منحني اخر فهو العاشق الولهان والحبيب الغيور والناصح الجاد الحنون القريب واللطيف المراعي للمشاعر وبنفس الوقت وبدون اي سبب وبدون اي انذار قد يقتل حبيبة ويغتال قلبة وهو يبتسم ابتسامتة الصفراء الماكرة لماذا لماذا هذا هو السوال المحير ليش ليش ليش !!!! ليش تذبح قلبي وتبعد بدون سبب وبدون انذار قعدة اراجع نفسي بكل خطوة وكل تفاصيل اخر لقاء بينا ليش رحلت ليش بس ابي اعرف ليش عشت بحيرة والسبب اني ما ادري ليش رحت وهل انا زعلتك بشى قلتة او تصرف لا مستحيل انت كنت تبي عذر علشان تروح ليش خليتني احبك ليش خليتني اتعلق فيك ليش خليتني اشوف كل الرجال بالعالم شرفاء ليش غيرت نظرتي للرجال قبلك كنت اكرهم وبعدك عرفت انك احسن واحد فيهم حاولت ادور على شخص يشغل مكانك بس اكتشفت انة مافي احد يشبهك ابدا اسمحلي اقول لك اكرهك اكرهك لاني وبصراحة اموت فيك اكرهك لانك بعيد واكرهك لانك كنت دايم قاسي معاي واكرهك لاني احبك ولا يمكن ارجع لك وبصراحة هم احبك اسفة اقصد اكرهك

البحر

كنت دايما احب البحر وصوتة حتي في الشتاء والبرد هم احبة احب اشوفك وانت تسبح واحب اشوف صدرك العريض يتبلل بالماء وبصراحة كنت احسد الماي لانة قريب منك عكسي الي كنت وااااقفة بعيد عنك بيني وبينك امتار بس اشوف ابتسامتك لي واللة احبك بعد كل شي هم احبك شعور لا يوصف انك تحب انسان تدري انة مولك ولا راح يصير بعمرة لك بس تحبة حتي لوتبعد عنة هم تحبة علاقتي معاك مثل البحر فيها مد وفيها جزر بس فيها امان وفيها استقرار غريب رغم انها ابعد ماتكون عن الاستقرار فيها وفاء ماتيناسب مع زمناة وفيها تحدي عجيب فيها تفاهم ماعرفة حتي الي عاشوا مع بعض طول عمرهم وفيها تناقض مثير فيها كل شي صح وعدل مع انها غلط من اساسها علاقة تربطني بشخص مينون وغريب شخص يفتني بضحكتة شخص يسحرني بعنادة ويذبحني بعيونة شخص يراعيني بقلبة ويقلب الدنيا على بكلامة شخص يفهمني بدون ما اتكلم شخص يشاركني حلمي ويشجعني ويقول ( الحلم مشروع بارض الواقع ) شخص يبنيني و مع الاسف يرجع يهدمني بس لاتخافون يهدمني لمصلحتي ودايما يرجع يبنيني بس بكل غباء قلت انا ماعدت اتحمل هالعلاقة المجنونة لوسمحت اطلع من حياتي تصقون انة صدقني وطلع !!!!وانقلبت حياتي على صار مالها داعي صار يومي مثل امسي مثل باجر مافي شي واااحد يشجعني علشان اعيش بس لما الحين اشوف البحر واحس انة يمي لا تلوموني واللة احبة من كل قلبي واحب البحر لانة يذكرني فية ادري راح ترجع وصدقني راح تلقاني انطرك

يوم فراق الغالي

اليوم اطلب منك واتمني انكم تشاركوني هذي الذكري علشان تخففون عني كنت دايما دلوعة الكل وخصوصا ابوي كنت وااايد احبة وااايد اعزة حتي امي كانت تغار مني من كثر ماكان يدلعني ردوا معاي سنة لوارة قبل سنة كان عندي كورس صيفي وابوي كان بالمستشفى قالوا لي انة صارة جلطة بالمخ طبعا طلعت من الجامعة ورحت على المستشفى على طول وقلوا ماتقدرين تدخلين علية في العناية المركزة وبصراحة وبيني وبينكم انا ماكنت ابي ادخل بعد لاني ما اقدر اشوف ابوي بهالحالة وخصوصا انها مو اول جلطة الي قبلها كانت جلطة خفيفة وقدر يقوم منها بسلامة انا اعرف ابوي راح يتخطى هذا الجلطة بعد لان ابوي قوي (صج ياهل) ما ادري ان كل شي بايد اللة المهم ظل بالمستشفى تقريبا 10 ايام كنت اروح المستشفى واسئل علية الدكاترة بس ما اتجرا وادخل العناية المركزة واشوفة ومنت هم اداوم بالجامعة بشكل عادي وكان يوم الاربعاء وكنت احس اني وااايد متظايقةما ادري ليش كنت احس انة في مو طبيعي بس قلت يمكن حاشني توتر من الامتحانات ومر يومي عادي بالجامعة والعصر على الساعة 5 رديت البيت وانا داشة شارعنا لاحظت سيارات وااايد عند البيت وقلت بيني وبين نفسي اكيد امي عازمة رفيجاتها اوف مالي خلق حدي تعبانة دخلت البيت وانصدمت لما دشيت الصالة اشوف الكل لابس اسود والكل عيونهم حمرا من كثر البجي والصياح وانا واقفة منصدمة واقول لهم منو شنو شفيكم ردي على علموني ولا تقوم وحدة وتقول لي عظم اللة اجرج في ابوج تخيلوا ابوي مات مات وانا ماشفتة ليش لاني كنت متاكدة انة راح يقوم بصحة راح بدون ما اسلم علية رااااااااااااااااح تدرون شنو ردت فعلي بالعزا اني سكت تصدقون اني مابجيت تصدقون اني قاسية لدرجت اني ا بجيت في عزاء الغالي مع ان قلبي يتقطع علية تصدقون اني ميتة احساس تصدقون اني مو مصدقة انة مات لحد الحين اتوقع باي لحظة ينفتح الباب ويدخل ابوي

انت الي علمتني

اقعد من النوم وانا ميتة من البرد مو لان الجو بارد لا هذا البرد داخلي مافي شي بالدنا يقدر يدفيني غيرك بس وينك انت ابعك انسان عني كلة منك انت الي خليتني احبك واتعلق فيك وانسي الدنيا كلة انت الي علمتني ان الدفى موجود بس في صدرك انت الي علمتني ان اقعد من النوم على صوتك انت الي علمتني ان الصبح ما يحلى بدون عطرك انت الي علمتني ان النسكافية الصبح ما يحلى بدون ابتسامتك على انغام الرائعة فيروز انت الي علمتني ان الجنون معاك احلى انواع الجنون انت الي علمتني انتك لي لي لي بس ماعلمتني الدنيا باخذك وتاخذني بعيد عنك بس ما علمتني انت الي راح يبقي لي بس ذكري بس ماعلمتني شلون انساك بس ماعلمتني شلون اعيش بدونك بس ماعلمتني شلون اقعد من النوم وامارس حياتي او الي بقى منها بدونك بس ماعلتني شلون ابتسم وانت بعيد عني

احب انكم تتعرفون على انا بنت اعتز بنوثتي وافتخر فيها واايد احب فكرة كوني بنت واستغل هالشغلة واايد يعني من ناحية الدلع والتغلى بس لا يروح بالكم بعيد انا مو مغرورة بالعكس متواضعة واحب الناس واحب الحياة احب اعيش حياتي بكل الطرق يوم عاقلة ويوم ياهل ويوم مطفوقة ويوق متهورة يومي يبدا الصبح الساعة 8 اقعد من النوم وانا اتحلطم ومالي خلق اخذ لي شور سريع والبس وانطلق للجامعة ابدا كلاسات وما اخلص الا الساعة تقريبا 7 المغرب ارجع البيت واكون هلكانة من التعب وطبعا اسبح واريح بعدين اشوف حياتي الخاصة وامي وبعدها اناااااااااام وهذي حياتي بالويك ان انام لحد الساعة 11 وبعدين اطلع العصر امااانة مو حيات فاضية مالها هدف صح ادرس وبجد بس مالي هدف ليش ما ادري

مرحبا مساء \صباح الخير شلونكم انا وااايد حبيت كتاباتكم وااايد اعجبتني فكرة المدونات احس انها تريحني بصراحة اول مرة بحياتي اكتب الي بداخلي وااايد ميتة من الخوف وما ادري شنو اقول وهم خايفة انكم ما تشجعوني شكرا لكم واتمني انكم تقبلوني اخت لكم